Onam Speech in Malayalam 2024 : ഓണം പ്രസംഗം മലയാളത്തിൽ 2024

1. ഓണാഘോഷ പ്രസംഗം 2024

ആമുഖം

പ്രിയ സഹോദരീ സഹോദരന്മാരെ, മലയാളികളുടെ മഹത്തായ ഉത്സവമായ ഓണത്തിന്റെ പൊൻ‌പ്രഭയിലേക്ക് ഏവർക്കും ഹൃദയം നിറഞ്ഞ സ്വാഗതം!

പൂക്കളവും ഓണത്തപ്പനും ഓണസദ്യയുമെല്ലാം ചേർന്ന് നമ്മുടെ മനസ്സുകളിൽ സന്തോഷത്തിന്റെയും സമൃദ്ധിയുടെയും പൂക്കാലം വിരിയിക്കുന്ന ഈ പുണ്യദിനത്തിൽ നമുക്ക് ഒന്നുചേർന്ന് ആഘോഷിക്കാം.

ഓണത്തിന്റെ പ്രാധാന്യം

ഓണം എന്നത് വെറുമൊരു ആഘോഷമല്ല, നമ്മുടെ സംസ്‌കാരത്തിന്റെയും പൈതൃകത്തിന്റെയും ആഘോഷമാണ്. മഹാബലി ചക്രവർത്തിയുടെ സുവർണ്ണ ഭരണത്തിന്റെ ഓർമ്മ പുതുക്കുന്ന ഈ ദിനം നമ്മെ ഐക്യത്തിന്റെയും സാഹോദര്യത്തിന്റെയും പാഠങ്ങൾ പഠിപ്പിക്കുന്നു. ജാതിമതഭേദമന്യേ എല്ലാവരും ഒന്നുചേരുന്ന ഈ ദിനം നമ്മുടെ സാമൂഹിക ഐക്യത്തിന്റെ പ്രതീകം കൂടിയാണ്.

നവകേരളം പടുത്തുയർത്താം

ഈ ഓണം നമുക്ക് നവകേരളം പടുത്തുയർത്താനുള്ള പ്രചോദനം നൽകട്ടെ. പ്രളയവും മഹാമാരിയും നമ്മെ തളർത്തിയെങ്കിലും, നമ്മുടെ മനസ്സുകളിൽ പുതിയ പ്രതീക്ഷകളും സ്വപ്നങ്ങളും നട്ടുവളർത്താനുള്ള ഈ അവസരം നമുക്ക് നഷ്ടപ്പെടുത്തരുത്. കൃഷിയും വ്യവസായവും വിദ്യാഭ്യാസവും ആരോഗ്യവും എല്ലാം ചേർന്നൊരു നവകേരളം സൃഷ്ടിക്കാൻ നമുക്ക് ഈ ഓണക്കാലത്ത് പ്രതിജ്ഞയെടുക്കാം.

പരിസ്ഥിതി സംരക്ഷണം

ഓണാഘോഷം പ്രകൃതിയോടിണങ്ങിയുള്ളതാകണം. പ്ലാസ്റ്റിക് മാലിന്യങ്ങൾ ഒഴിവാക്കി, പരമ്പരാഗത രീതിയിലുള്ള പൂക്കളം ഒരുക്കാം. നമ്മുടെ നാടിന്റെ ഹരിതാഭയ്ക്ക് കോട്ടം തട്ടാതെ ഓണം ആഘോഷിക്കാം.

സാമൂഹിക പ്രതിബദ്ധത

ഈ ഓണക്കാലത്ത് നമുക്ക് സാമൂഹിക പ്രതിബദ്ധത കൂടി ഓർക്കാം. സമൂഹത്തിലെ അവശരേയും പാർശ്വവൽക്കരിക്കപ്പെട്ടവരേയും ചേർത്തുപിടിക്കാം. അവരുടെ ജീവിതത്തിലും ഓണത്തിന്റെ സന്തോഷം പകരാൻ നമുക്ക് പരിശ്രമിക്കാം.

ഉപസംഹാരം

ഈ ഓണം നമ്മുടെ ജീവിതത്തിൽ പുതിയൊരു തുടക്കത്തിന്റെ പ്രതീകമാകട്ടെ. നമുക്ക് ഈ ദിനം ഒന്നിച്ചാഘോഷിക്കാം, പരസ്പരം സ്നേഹം പങ്കുവെക്കാം.

എല്ലാവർക്കും ഐശ്വര്യപൂർണ്ണമായ ഓണാശംസകൾ!

ഓണം പൊന്നോണം 2024 ഓണം പ്രസംഗം; ഐതീഹ്യം, ആഘോഷങ്ങൾ, അറിയേണ്ടതെല്ലാം : ഓണം എന്നാൽ മലയാളിക്ക് ആഘോഷത്തിൻ്റെ നാളുകളാണ്. ചിങ്ങ മാസത്തിലെ അത്തം മുതൽ പത്ത് ദിവസം നീണ്ടുനിൽക്കുന്ന ആഘോഷം. ജാതിമത ഭേദമന്യേ മലയാളികൾ ഓണത്തിനായുള്ള കാത്തിരിപ്പ് തുടങ്ങിക്കഴിഞ്ഞു.

കേരളീയരുടെ മഹോത്സവമായ ഓണത്തിന് ഇനി ദിവസങ്ങള്‍ മാത്രം. ലോകത്തിൻ്റെ നാനാഭാഗത്തുമുള്ള മലയാളികള്‍ ജാതിമത ഭേദമന്യേ ഓണത്തിനായുള്ള കാത്തിരിപ്പ് തുടങ്ങിയിരിക്കുന്നു.

Also Read : Kuttanadan Punjayile Lyrics in Malayalam and English

---

2. ഓണം പ്രസംഗം മലയാളത്തിൽ

ആദരണീയരായ അധ്യാപകരേ, പ്രിയപ്പെട്ട സഹപാഠികളേ, എല്ലാവർക്കും എന്റെ ഹൃദയം നിറഞ്ഞ ഓണാശംസകൾ!

പൊന്നിൻ ചിങ്ങമാസത്തിന്റെ പുലരിയിൽ, നമ്മുടെ മനസ്സുകളിൽ പൂവിടുന്ന സന്തോഷത്തിന്റെയും സമൃദ്ധിയുടെയും ഉത്സവമാണ് ഓണം. മാവേലിത്തമ്പുരാന്റെ ഐശ്വര്യപൂർണ്ണമായ ഭരണകാലത്തെ അനുസ്മരിപ്പിക്കുന്ന ഈ ഉത്സവം, നമ്മുടെ സംസ്കാരത്തിന്റെയും പാരമ്പര്യത്തിന്റെയും അമൂല്യ നിധിയാണ്.

ഓണക്കാലം നമ്മെ ഓർമ്മിപ്പിക്കുന്നത് ഐക്യത്തിന്റെയും സാഹോദര്യത്തിന്റെയും സന്ദേശമാണ്. ജാതിമതഭേദമന്യേ, എല്ലാ മലയാളികളും ഒന്നുചേർന്ന് ആഘോഷിക്കുന്ന ഈ ഉത്സവം, നമ്മുടെ സമൂഹത്തിന്റെ മതേതര സ്വഭാവത്തിന്റെ ഉത്തമ ഉദാഹരണമാണ്.

പൂക്കളം, ഓണസദ്യ, വള്ളംകളി, കൈകൊട്ടിക്കളി, തുടങ്ങി ഓണത്തെ വർണ്ണാഭമാക്കുന്ന നിരവധി ആചാരങ്ങളും അനുഷ്ഠാനങ്ങളും നമ്മുടെ പൈതൃകത്തിന്റെ ഭാഗമാണ്. ഈ ആഘോഷങ്ങൾ നമ്മുടെ കുടുംബാംഗങ്ങളെയും സുഹൃത്തുക്കളെയും ഒന്നിപ്പിക്കുകയും പരസ്പര സ്നേഹവും ബഹുമാനവും വളർത്തുകയും ചെയ്യുന്നു.

ഓണക്കാലം നമ്മെ ഓർമ്മിപ്പിക്കുന്നത് പങ്കുവയ്ക്കലിന്റെയും കരുതലിന്റെയും പ്രാധാന്യമാണ്. ഓണസദ്യയിൽ നാം എല്ലാവരും ഒന്നിച്ചിരുന്ന് ആഹാരം കഴിക്കുന്നത് ഈ സന്ദേശത്തിന്റെ പ്രതീകമാണ്. നമ്മുടെ സമൂഹത്തിലെ അശരണരും പാർശ്വവൽക്കരിക്കപ്പെട്ടവരുമായ ആളുകളെ കൈത്താങ്ങാനും ഈ ഓണക്കാലം നമുക്ക് പ്രചോദനമേകട്ടെ.

ഈ ഓണക്കാലം നമുക്ക് പുതിയ പ്രതീക്ഷകളും സ്വപ്നങ്ങളും നൽകട്ടെ. നമ്മുടെ ജീവിതത്തിൽ സന്തോഷവും സമാധാനവും നിറയട്ടെ. നമ്മുടെ നാടിന്റെ പുരോഗതിക്കും ക്ഷേമത്തിനും വേണ്ടി നമുക്ക് ഒരുമിച്ച് പ്രവർത്തിക്കാം.

എല്ലാവർക്കും ഒരിക്കൽ കൂടി ഹൃദയം നിറഞ്ഞ ഓണാശംസകൾ!

---

3. Onam Essay in Malayalam – Short Essay – ഓണം പ്രസംഗം

കേരളത്തിലെ ഒരു പ്രധാന ഉത്സവമാണ് ഓണം. സാധാരണയായി ആഗസ്ത്, സെപ്തംബർ മാസങ്ങളിൽ ഇത് വരുന്നു. കേരളത്തിലെ പുരുഷന്മാരും സ്ത്രീകളും കുട്ടികളും ഈ ഉത്സവത്തിന്റെ ആഹ്ലാദത്തോടെ കാത്തിരിക്കുകയാണ്.

മലയാളികളുടെ  ദേശീയോൽസവമാണ് ഓണം . ഈ വാർഷിക ഗ്രിഗോറിയൻ കലണ്ടറിൽ ഓഗസ്റ്റ് – സെപ്റ്റംബർ മാസങ്ങളിലും മലയാളം കലണ്ടറിൽ ചിങ്ങ മാസത്തിലുമാണ് വരുന്നത്. ഓണാഘോഷത്തിന്റെ സമയത്ത് കേരളം സന്ദർശിക്കുന്ന മഹാബലിയുടെ ഓർമ്മയ്ക്കായാണ് ഈ ആഘോഷം കൊണ്ടാടുന്നത്. ലോകത്തിന്റെ നാനാഭാഗത്തുമുള്ള മലയാളികൾ ജാതിമത ഭേദമന്യേ ഈ ഉത്സവം ആഘോഷിക്കുന്നു.

ഓണം സംബന്ധിച്ച് പല ഐതിഹ്യങ്ങളും ചരിത്രരേഖകളും നിലവിലുണ്ടെങ്കിലും ഓണം ആത്യന്തികമായി ഒരു വിളവെടുപ്പു അഥവാ വ്യാപാരോത്സവമാണെന്ന് കരുതിപ്പോരുന്നു. കേരളത്തിൽ ഓണം തമിഴ്‌നാട്ടിൽ നിന്നും സംക്രമിച്ചതാണെന്നാണ് വിദഗ്ദ്ധമതം. ഏ.ഡി. 8 വരെ ദ്രാവിഡ ദേശം പലനിലയിൽ സമാനവും ആയിരുന്നു. ഒരു സ്മരണയുടെ പ്രതീകമായിട്ടാണ് ഈ ഉത്സവം തുടക്കം കുറിച്ചത്. മഹാബലി സ്മരണയാണ് അത്. വാമനവിജയത്തെ അടിസ്ഥാനമാക്കി അത് ക്ഷേത്രോത്സവമായിട്ടായിരുന്നു തുടങ്ങിയതെങ്കിലും പിന്നീട് അത് ഗാർഹികോത്സവമായി മാറി.

ചിങ്ങമാസത്തിലെ അത്തം നക്ഷത്രം മുതൽ തുടങ്ങുന്ന ഓണാഘോഷം തിരുവോണം നാളിൽ പ്രാധാന്യത്തോടെ ആഘോഷിക്കുകയും ചതയം നാൾ വരെ നീണ്ടു നിൽക്കുകയും ചെയ്യുന്നു. തൃക്കാക്കരയാണ്‌ ഓണത്തപ്പന്റെ ആസ്ഥാനം. എന്നാൽ അവിടെ മഹാബലിക്കു പകരം വാമനനെയാണ് ആരാധിക്കുന്നത്. ഒരു പക്ഷെ വാമനൻ മഹാബലിക്കുമേൽ വിജയം നേടിയത് തൃക്കാക്കരയിൽ വച്ചാവാം. മഹാബലിയെ വാമനൻ പാതാളത്തിലേയ്ക്ക് ചവിട്ടിത്താഴ്ത്തിതി എന്ന ഒരുകഥക്ക്പ്രചാരമുണ്ട്. പക്ഷെ ചവിട്ടി താഴ്ത്തിയ ഒരു കഥ എവിടെയും പറയുന്നില്ല. ഭാഗവത പുരാണത്തിലാണ് ബലിയുടെ കഥയുള്ളത്.അതിൽ സുതലത്തിലേക്ക് പറഞ്ഞയക്കുകയും, മഹാവിഷ്ണു അദ്ദേഹത്തിൻ്റെ ദ്വാരപാലകനായി നിന്നു എന്നുമാണ് കഥ.

അസുരരാജാവും വിഷ്ണുഭക്‌തനുമായിരുന്ന പ്രഹ്ലാദന്റെ പേരക്കുട്ടി ആയിരുന്നു മഹാബലി. മഹാബലി എന്ന വാക്കിനർത്ഥം ‘വലിയ ത്യാഗം’ ചെയ്‌തവൻ എന്നാണ്‌. ദേവൻമാരെപ്പോലും അസൂയപ്പെടുത്തുന്നതായിരുന്നു മഹാബലിയുടെ(മാവേലിയുടെ) ഭരണകാലം. അക്കാലത്ത്‌ മനുഷ്യരെല്ലാവരും ഒരുപോലെയായിരുന്നു. കള്ളവും ചതിയും പൊളിവചനങ്ങളും ഇല്ലായിരുന്നു. എങ്ങും എല്ലാവർക്കും സമൃദ്ധിയായിരുന്നു. മഹാബലിയുടെ ഐശ്വര്യത്തിൽ അസൂയാലുക്കളായ ദേവൻമാർ മഹാവിഷ്ണുവിന്റെ സഹായം തേടി മഹാബലി ‘വിശ്വജിത്ത്‌’ എന്ന യാഗം ചെയ്യവേ വാമനനായി അവതാരമെടുത്ത മഹാവിഷ്ണു ഭിക്ഷയായി മൂന്നടി മണ്ണ്‌ ആവശ്യപ്പെട്ടു.

ചതി മനസ്സിലാക്കിയ അസുരഗുരു ശുക്രാചാര്യരുടെ വിലക്കു വക വയ്ക്കാതെ മഹാബലി മൂന്നടി മണ്ണ്‌ അളന്നെടുക്കാൻ വാമനന്‌ അനുവാദം നൽകി. ആകാശംമുട്ടെ വളർന്ന വാമനൻ തന്റെ കാൽപ്പാദം അളവുകോലാക്കി. ആദ്യത്തെ രണ്ടടിക്കു തന്നെ സ്വർഗ്ഗവും ഭൂമിയും പാതാളവും അളന്നെടുത്തു. മൂന്നാമത്തെ അടിക്കായി സ്ഥലമില്ലാതെവന്നപ്പോൾ മഹാബലി തന്റെ ശിരസ്സ്‌ കാണിച്ചുകൊടുത്തു. വാമനൻ തന്റെ പാദ സ്പർശത്താൽ മഹാബലിയെ അഹങ്കാരത്തിൽ നിന്ന് മോചിതനാക്കി സുതലിത്തിലേക്ക് ഉയർത്തി. ആണ്ടിലൊരിക്കൽ അതായത്‌ ചിങ്ങമാസത്തിലെ തിരുവോണനാളിൽ തന്റെ പ്രജകളെ സന്ദർശിക്കുന്നതിന്‌ അനുവാദവും വാമനൻ മഹാബലിക്കു നൽകി. അങ്ങനെ ഓരോ വർഷവും തിരുവോണ നാളിൽ മഹാബലി തന്റെ പ്രജകളെ അദൃശ്യനായി സന്ദർശിക്കാൻ വരുന്നു എന്നാണ് ജനങ്ങളുടെ ഇടയിൽ ഉള്ള വിശ്വാസം.

പരശുരാമൻ

പരശുരാമകഥയുമായി ബന്ധപ്പെട്ട മറ്റൊരു ഐതിഹ്യവും ഓണത്തെ സംബന്ധിച്ചിട്ടുണ്ട്‌. വരുണനിൽനിന്ന്‌ കേരളക്ഷേത്രത്തെ മോചിപ്പിച്ച്‌ ബ്രാഹ്മണർക്ക്‌ ദാനം നൽകിയ പരശുരാമൻ അവരുമായി പിണങ്ങിപ്പിരിയുന്നു. മാപ്പപേക്ഷിച്ച ബ്രാഹ്മണരുടെ അഭ്യർത്ഥനയെ തുടർന്ന്‌ വർഷത്തിലൊരിക്കൽ തൃക്കാക്കരയിൽ അവതരിക്കുമെന്ന്‌ വാഗ്ദാനം ചെയ്യുന്നു. ഈ ദിവസം ഓണമെന്നും സങ്കൽപ്പമുണ്ട്‌. ഇതും കെട്ടുകഥയാണെന്നു തന്നെയാണ്‌ നിഗമനങ്ങൾ. പരശുരാമനെക്കുറിച്ചുള്ള കഥകൾ വിവരിക്കുന്ന കൃതികൾ പത്താം നൂറ്റാണ്ടിനു ശേഷം രചിക്കപ്പെട്ടവയാണ്. എന്നാൽ അതിന് എത്രയോ മുമ്പുതന്നെ കേരളം ദേശമായി രൂപപ്പെട്ടു കഴിഞ്ഞിരുന്നു.

അത്തപ്പൂക്കളം

ഓണത്തിലെ ഒരു പ്രധാന ആഘോഷത്തിൽപ്പെട്ടതാണ് ഓണപ്പൂക്കളം. തിരുവോണദിവസം വരുന്ന മാവേലിത്തമ്പുരാനെ സ്വീകരിക്കുന്നതിന്‌ അത്തം മുതൽ ഒരുക്കങ്ങളാരംഭിക്കുകയാണ്‌. ‘അത്തം പത്തോണം’ എന്ന്‌ ചൊല്ല്‌. മുറ്റത്ത്‌ തറയുണ്ടാക്കി ചാണകം മെഴുകി പൂക്കളമൊരുക്കുന്നു. ചിങ്ങത്തിലെ അത്തംനാൾ മുതലാ‍ണ് പൂക്കളം ഒരുക്കാൻ തുടങ്ങുന്നത്. ആദ്യത്തെ ദിവസമായ അത്തംനാളിൽ ഒരു നിര പൂ മാത്രമേ പാടുള്ളൂ. ചുവന്ന പൂവിടാനും പാടില്ല. രണ്ടാം ദിവസം രണ്ടിനം പൂവുകൾ മൂന്നാം ദിവസം മൂന്നിനം പൂവുകൾ എന്നിങ്ങനെ ഓരോ ദിവസവും കളത്തിന്റെ വലിപ്പം കൂടി വരുന്നു. ചോതിനാൾ മുതൽ മാത്രമേ ചെമ്പരത്തിപ്പൂവിന്‌ പൂക്കളത്തിൽ സ്ഥാനമുള്ളൂ. ഉത്രാടത്തിൻനാളിലാണ്‌‍ പൂക്കളം പരമാവധി വലിപ്പത്തിൽ ഒരുക്കുന്നത്‌. മൂലം നാളിൽ ചതുരാകൃതിയിലാണ് പൂക്കളം ഒരുക്കേണ്ടത്

ഓണസദ്യ

ഓണത്തിന്റെ പ്രധാനാകർഷണം ഓണസദ്യയാണ്‌. ‘ഉണ്ടറിയണം ഓണം’ എന്നാണ്‌ വയ്പ്‌. ആണ്ടിലൊരിക്കൽ പപ്പടവും ഉപ്പേരിയും കൂട്ടാനുള്ള അവസരമായിരുന്നു പണ്ടൊക്കെ സാധാരണക്കാരന്‌ ഓണം. കാളൻ, ഓലൻ, എരിശ്ശേരി എന്നിവയാണ്‌ ഓണസദ്യയിൽ പ്രധാന വിഭവങ്ങൾ. അവിയലും സാമ്പാറും പിന്നീട്‌ വന്നതാണ്‌. നാലുകൂട്ടം ഉപ്പിലിട്ടതാണ്‌ കണക്ക്‌- കടുമാങ്ങ, നാരങ്ങ, ഇഞ്ചിപ്പുളി, ഇഞ്ചിതൈര്‌. പപ്പടം ഇടത്തരം ആയിരിക്കും.

10 പലക്കാരൻ, 12 പലക്കാരൻ എന്നിങ്ങനെ പപ്പടക്കണക്ക്‌. ഉപ്പേരി നാലുവിധം- ചേന, പയർ‌, വഴുതനങ്ങ, പാവക്ക, ശർക്കരപുരട്ടിക്ക്‌ പുറമേ പഴനുറുക്കും പഴവും പാലടയും പ്രഥമനും.വിളമ്പുന്നതിനും പ്രത്യേകതയുണ്ട്‌. നാക്കില തന്നെ വേണം ഓണസദ്യക്ക്‌. നാക്കിടത്തുവശം വരുന്ന രീതിയിൽ ഇല വയ്ക്കണം. ഇടതുമുകളിൽ ഉപ്പേരി, വലതുതാഴെ ശർക്കര ഉപ്പേരി, ഇടത്ത്‌ പപ്പടം, വലത്ത്‌ കാളൻ, ഓലൻ, എരിശ്ശേരി, നടുക്ക്‌ ചോറ്‌, നിരന്ന്‌ ഉപ്പിലിട്ടത്‌. മദ്ധ്യതിരുവതാംകൂറിൽ ആദ്യം പരിപ്പുകറിയാണ്‌ വിളമ്പാറ്‌. സാമ്പാറും പ്രഥമനും കാളനും പുറമേ പച്ചമോര്‌ നിർബന്ധം. ഇവിടെ ഓണത്തിന്‌ മരച്ചീനിയും വറക്കാറുണ്ട്‌.

ഓണപ്പാട്ടുകൾ

ഒരുപാടു പൂപ്പാട്ടുകളും കളിപ്പാട്ടുകളും മലയാളത്തിന്‌ സമ്മാനിച്ചതാണ്‌ ഓണം. കാലാകാലങ്ങളായി പാടിപ്പതിഞ്ഞ ഇവ വാമൊഴിയായി തലമുറകൾ പങ്കിട്ടെടുക്കുകയാണ്‌. ഓണത്തിന്റെ ഐതിഹ്യം വിളിച്ചോതുന്ന ഒരു ഓണപ്പാട്ട്.

“മാവേലി നാട് വാണീടും കാലം
മാനുഷരെല്ലാരുമൊന്നുപോലെ
ആമോദത്തോടെ വസിക്കും കാലം
ആപത്തങ്ങാർക്കുമൊട്ടില്ല താനും
ആധികൾ വ്യാധികളൊന്നുമില്ല
ബാലമരണങ്ങൾ കേൾക്കാനില്ല.
കള്ളവുമില്ല ചതിയുമില്ല
എള്ളോളമില്ല പൊളി വചനം
കള്ളപ്പറയും ചെറു നാഴിയും,
കള്ളത്തരങ്ങൾ മറ്റൊന്നുമില്ല.”

അനുഷ്ഠാന കലകൾ

ഓണത്തെയ്യം

വേലൻ തുള്ളൽ

ഓണേശ്വരൻ (ഓണപ്പൊട്ടൻ)

ഓണവില്ല്

ഓണക്കളികൾ

ആട്ടക്കളം കുത്തൽ

കൈകൊട്ടിക്കളി

പുലിക്കളി

ഓണക്കുമ്മാട്ടി (കുമ്മാട്ടിക്കളി)‌

ഓണത്തല്ല്

ഓണംകളി

കമ്പിത്തായം കളി

ഭാരക്കളി

നായയും പുലിയും വെയ്ക്കൽ

ആറന്മുള വള്ളംകളി

തലപന്തു കളി

കിളിത്തട്ടുകളി

സുന്ദരിക്ക് പൊട്ട്കുത്ത്

വടംവലി